士為知己者死

8 月又一次大地震，總共有 3 位治療師走，老實講，老馬走O左之後實在自由了很多，無乜壓力，走了這三位治療師之後，更覺得自己地位實在了，因為這 3 位都是有經驗的治療師，走了之後我唔敢講老細無O左我唔掂，但若果我走了，他都會頭痕一陣。話說回來，點解今日咁得閒寫日誌，因為拎了病假。這是打工的好處，本來都諗住撐埋今日，因為已發燒了 2 天，今天小晴話唔俾我返工，心諗前陣子的事，實在無謂賣命，放自己一天假，又有什麼問題，這是我的權利。
話說前排運動室易將，一個舊同學做了那裡的 TEAM HEAD，正所謂新官上任，使用了很多新制度，制度是用來令工序順暢，我一向都贊成，但若果工序變得刻板，不能變通，只會令民怨沸騰，最後只有革命政變或者變成在工廠內工作。我都不想多說什麼事情令我和這位同事持不同意見，總之最後老細竟然幫這位同事都不站在我這一邊。我一直都知我唔係 "肥佬" (我老細) O既心腹，但我估唔到係一件平等的事上他都不能持平，我能夠為一個愚蠢O既老細賣命，但我絶不會為一個黑白不分的老細拼命，正所謂 "士為知己者死" 既然你不是伯樂，我也無需要為你效力。又一次令我產生出來做的念頭，眼看另一位出來開舖的朋友可以買樓，宜家外面係咪真係咁好境呀？但小晴做王太真係做得好好喎，每天返屋企有飯食，屋企又有人打掃，病了又有人煮好好味O既粥食，所以我都唔介意，既然係咁，我應該按章工作，病了，就唔好返工喇 ...

人來人去

正所謂 "有人辭官歸故里，有人漏夜趕科場"，這個世界每天都變，不變的只有你自己。今天又收到消息，又有兩個同事會走，想不到老馬走了不夠兩個月，就己經有 3 個同事辭職，雖然好唔明點解 D 同事要走，之前就話老馬成日發癲，做得唔開心，但宜家走了，她的忠臣與心腹都相繼離去，我相信這個情況都會維持一段日子，但一個部門的發展，好睇管理階層，今次係兩個高層離職，睇O黎係最高層的考驗，若果佢地唔穗定一下民心，我相信最終會散。有人走就自然有人O黎，可能小晴講得O岩啦，始終我唔係呢個時段入O黎O既人，同新同事總有一些隔幕，而舊同事又一個一個咁走，真係有時候都幾寂寞。希望離職的同事真的會有一番新境象啦。
前兩天有人問我去唔去一個同事爸爸的葬禮，你都唔好話呢度邪，係度做O左 3 年就已經有 2 個同事阿爸爸突然過身，希望這位同事節哀順變啦，正所謂人來人去，有人誓世就有新生命，終於榮升為二叔，望著阿嫂個肚一天一天咁大，都好想佢快 D 生，平平安安，畢竟自己有個不愉快的經歷，所以好希望別人可以順順利利，而且這個是親人，六磅幾，雖然還未可以抱到上手，但已經覺得這個 BB 會很幸福，因為有我們這一家人為她緊張，ESTHER，祝你快高長大，健康快樂。

立冠又一

同自己講聲生日快樂先！不知道為何今年多了人跟我說生日快樂，可能人越大越覺得友誼可貴。又大一歲了，今年真的發生了很多事，有不開心的，也有開心的。我每一年都會回顧，但今年真的不想作回顧，我希望做前瞻，因為我覺得人是需要有希望的、人是應該樂觀的。
今年同事又搞遊船河，真的不太想去，因為上一年老婆大著肚都去玩，卒之跌斷手，隨之小朋友也沒有了，不知是不是報應 ... 今年心裏都掙扎O左一陣，但要衝破就要去面對，畢竟人要向前望！
今年希望可以有點突破，會讀書考試，6 月將會有 3 個試要考，希望全部一 TAKE 過，最希望當然係小晴再次懷孕啦，但我知道這是天意，不得強求，總之聽從天意啦，亦希望今年可以置業，但睇美國現時經濟，我諗又要寄望下一年。
近呢幾個月都去了幾次旅行，再一次感受到打工的好處，剛剛醫院又話加假加到 21 日 (HA 有 25 日大假) 好O野，又可以休息下，所以近幾個月都有點 RELAX FEEL ，而且小晴近來下煮，終於一嘗幾天住家飯的好。
今個月應該有新生命的來臨，等了這麼久，終於為我們的小家族添了點生氣，希望姪女健健康康、開心快樂。本來有很多O野想講，但每一次埋到部機，打起字來又唔記得了，ANYWAY ，祝大家都健康快樂。

老細唔願見，存心扮低 B

唔知大家有無睇鐵馬尋橋，可能有好多人會覺得唔好睇，但我就覺得幾好睇。當然最多人記住的都係「修合無人見、存心有天知」，我覺得這句話很有意思。今個星期開始，又俾人調了做門診，門診其實係龍口位，若果真係諗住等日出O黎開舖，MARK 定一兩個大馬沙真係唔錯，可惜 BOOKING 排到密密麻麻，做到有點抖唔到氣，希望遲 D 會適應多 D 。
星期二收到風，老馬 (其中一個老細) 會調去聖保褖醫院，真係對唔住碧姬，因為係佢爆料俾我聽，但我就爆響口，搞到佢俾人鬧，SOR 呀﹐不過，呢個消息真係好轟動，所以好想好多人好快知，但最後我都覺得收一收先，始終 "美好的一天即將來臨" ，雖然唔知佢係咪全個人調過去，不過，我諗至少我耳根會清靜唔少，而且呢個消息一出，我諗有好多人都會唔想辭職住 ... 哈哈
不過，話時話，我諗至少宜家己經有 3 個同事辭職，而且我見出面好多私家醫院都請人，可惜我知好多都係請女人，所以我都無寄信了。
睇到有同學仔可以出 PAPER，覺得自己近幾年都幾小圈子，係醫院不斷建立東西，可惜在自己的事業上好似無乜進展，今日去街工講書，佢地俾O左個長期服飾獎俾我，我心諗 ... 6 年O者，都唔係好老O者，唔係俾獎呀，不過，我確實係連續做得最耐O既一個員工，再諗深入 D ，自己係咪應該係另外一個層面上尋求一 D 進步與突破呢？ANYWAY，都係得個諗字 ...

復活節假的感想

很難得復活節 5 天放了 4 天，可能係老細見我仲有大假未放，再唔放就更加多假啦。有假係打工的一個好處，試諗下呢 5 天，話就話假期，若果你係老細，其實你少了 5 天的收入了 ... (我都係唔適合做老細) 前陣子阿媽見小晴心情一般，想搵人打堂齌，其實心裏面有時候都會想起仔仔，尤其是今年特別多朋友大肚，見到一個二個都擁有自己的仔女，心裏都有點酸，有一次同阿豪傾起，佢都講得好O岩，即使小晴再懷孕，都唔代表你可以忘記上一個，因為他真的存在過。所以宜家諗番起，唔會再咁傷感，只會記得有他的回憶，人始終要向前看。
今年仍然有薪加，但又是一個 POINT，小晴話工作量越來越多，應該加更多，但我知道老細唔會囉，所以 3 月衝完一輪，扮完勤力之後又可以做回自己，近日有很多同事都話走，一個師妹就頂唔順太多O野做，另一個就因為俾人鬧得太多，睇番宜家O既形勢都幾惡劣，因為人其實剛剛夠，一有人請假就 DOWN 晒，新人O黎又要 TRAIN 過 ... 所以真的很難做，但有時候都明白點解 D 人會走，最唔明係新畢業的人，覺得人工差不多但這裡辛苦十倍，要知道這裡學到的外面一定學不到，我不是賣花讚花香，這裡學到的比醫院學到的多幾倍，最初都覺得政府醫院學到很多，但近期一個師弟的來臨令我覺得政府醫院 TRAIN 出來的都不一定是完美的。
小晴終於完成了她的學位課程，遺憾的是不能與 BB 一齊慶祝，但不打緊，因為他會繼續祝福我們。可能因為 BB 的事，令我覺得小晴需要更多的休息，她對她的工作環境己經很不滿，所以我覺得她不工作也不打緊，最緊要我有番個老婆，亦因為咁，我暫時唔可以出來闖住，我要一個穩定O既環境給我和我的家人。
近來很流行單眼反光鏡相機，之前都諗住 BB 出生就買番部，再加個 CAM，宜家就唔買住了。而我阿哥同我諗法一樣，所以佢買了 CANON 550D ，一下子突然好想研究點樣可以影靚相，買了本書研究緊，希望第日都買番部玩下。今年終於"的" 起心肝讀書，報了 ACSM O既 EXERCISE SPECIALIST ，希望一 TAKE 成功啦。話咁快就放完 4 天假，因為這星期都不是太舒服，難為了小晴陪了我整個假期在家，謝謝。很久無試過放假在家中休息，結論是 ... 我想買樓，不是住得不舒服，而是我想、我覺得應該可以更好 (可能是這幾天都有去人屋企，覺得自己屋企真的不太像樣，至少想招呼朋友的地方也沒有)，好！努力搵錢，搬大屋！！

放下工作

想不到不斷叫人拍我型照，最後夠我內子完成。雖然唔係咩大機、專業相機，但都好滿意。

因為要清假，三月本來同屋企人去旅行，但父母剛剛去完新加坡，覺得太累，一心諗住香港 HEA 幾日就算，因為我從未試過放大假係香港過，點知小晴又話可以放假，太好了，地點真的無所謂，最後我地揀O左韓國首爾，其實我都無乜期望，總之有假放、有地方去，唔駛我煩就得，點知我一話去韓國，很多電話打俾我地兩個，真係少有。

還記得我星期一去報團，問佢有無星期四去日本的。有間旅行社話：玩O野咩先生，你星期一O黎問星期四的團，根係無啦，最快都要 ... 我都知，但我都係剛剛先肯定小晴有假放，急就急了點，一心都諗住短線團，所以入了中旅社。問問下個姐姐竟然彈了一個超抵韓國團，大家要知道女人O既心態，唔理咩地方，一講到平了很多的團，佢地就會去那個。所以最後我地去了韓國。
韓國我十年前都去過，所以都覺得可以去多次。而今次亦令我好滿意，旅行社啦，我覺得服務唔錯，不管個領隊好似跟團咁，但個導遊真係一百分，雖然我好少跟團，而且佢 D 資料亦有唔準O既時候，但整體來講，係我跟團咁多次最真的一個導遊。地點方面都有驚喜，有適合想看風景、游閒的我，亦有適合 SHOPPING 、購物的小晴，而且天氣，同團的人都好好，領隊最後都講得好O岩，我都無留意，真係要天時、地利、人和先得，所以總算係給我 2010 年的好開始，希望真的轉運，給我想要的。

唔知道大家有無睇 "老公萬歲"，身為老公的我就覺得好好睇，有些情節好搞笑，亦有一些好有同感，我唔係話小晴驚我出去滾，宜係只有身為老公先會感受到的經歷，或者新婚的朋友有機會一年後再睇睇，可能你都會覺得好睇。

三月，又係做年檢的時候。今年聽風聲有些同事好似無人工加，不過都係聽聞，不能盡信，我都係本著一個理念，你唔加人工俾我我都唔會辭職，但加俾我我就會幫你做 EXTRA WORK 囉，所以心情都 OK，無上一年咁緊張，三月仲要清假，睇O黎仲可以休息多一陣。

虎年 . 苦年

終於過O左牛年，因為牛年真的唔開心，之前三年都犯太歲，但平安無事，但想不到今年之內發生了這麼多不幸的事。第一有血光之災，手肘傷到要聯針，第二無O左個 BB。之後又有很多投訢，工作失誤 ... 總之牛年就勁唔 "老黎" 啦。
等了很久才到了虎年，不知是我心情差定真係少了佈置，我覺得今年虎年少了點新年氣氛。四周圍都不是太多喜氣洋洋的臉孔，可能係自己心情都不是太好，臨近年尾有同事話我火氣大，我都唔覺，但新年小晴哭了，我才覺得自己確實係執著了點。可能牛年真的不如意，很容易就令我火起，對不起所有近日俾我鬧過的人。
有時候都會諗今年生小朋友都不是太好，虎年、苦年。生了個仔 "苦苦聲"，佢O既人生唔通真的很苦，都係下一年先啦，但我家姐同阿嫂都有了身孕，所以我都唔咁亂講，講到呢度，大家係咪覺得我迷信了很多呢？我不是迷信，只是心有事情想不通，唯有將這些事情賴在這些度O者。本來有個醫生叫我出來幫手，但自己真的未 READY，今年發生了這麼多事，我心理上未準備好，或者等多陣啦，小晴問是不是東風？我覺得這陣風很重要，但 TIMING 唔O岩，所以我婉拒了。還有10 天大假要清，三月或者再去一次旅行，我都想整理一下我的人生，不停工作令我有點執著，我覺得我應該學到放開 ... 就正如機場的無人駕駛列車候車處，大大個 " RELAX !" 令你都覺得自己是不是心急了點。
話說回來，今次星加坡之旅都有點啟發，今日的星加坡比係十年前的星加坡真係無得比，十年前我去全部都係公屋間局，今日去己經有豪宅，很多高樓大廈的建築物，其實又係喎，十年前的香港又不是這樣麼？所以星加坡真的常常與香港比較，今次去聖淘沙，多人度呢 ... 但他們的工作態度真的很差，又慢又唔熟手，什麼地方也是，不只是賭場、酒店、公共交通、入境處 ... 大家可以放心，給他 20 年，他們也不能和香港比。可能你會話我急性子，但酒店的人可以問你 "今日唔換床單、明天換，OK ？" 你可以想像他們的腦袋究竟裝著什麼，機場無之前的那麼亂，這個要讚的，樟宜機場我可以鈎出最差機場之一，但新加坡 ... 真的還有很多地方改善，希望十年後可以再好 D
最後祝大家虎年行大運，龍馬精神、步步高陛、連生貴子、出入平安、心想事成！恭喜、恭喜。

放 .. 不開 ..的假

很久沒有試過放連續假，而且係 3 日，仲要係無 REQUEST 之下，本來應該開開心心，可惜放假前的一日，令我心裏不是味道，又再一次打擊我出來闖天下的念頭。
話說因為同事的錯誤，有一個 CASE 明明出了院還要返來做多一次治療，點知佢一拉完腰就行唔到，等了很久，搞了很多治療，3 小時仍沒有好轉，最終入院。雖然我反覆思量，而且個 PATIENT 都無乜怪我，但都是因為我..的治療，令到佢行到入O黎，但返唔到出去。心裏不是味兒，我知道即使佢要告我，佢唔會告得入，但我好像令到一個病人情況轉差，即使是巧合，心裏戚戚然的感覺揮之不散。希望佢係我返去之前可以平安出院。
呢次事件又一次令我覺得若果我自己出O黎做，遇上呢 D 情況，我可唔可以 HANDLE 呢？我已經說過，我不是幸運兒，從來很多黑仔的事情都會發生係我身上。係法國工作就O黎三年了，印象中要寫報告都寫了三次 ... 有很多我覺得做得麻麻的同事做了咁多年，都未寫過一次報告，那是不是告訴我，我做得比其他人差，還是我的際遇就是這麼不好 ... 前兩次的意外，我可以說是大意，但今次... 我摸不著頭腦，我不知道錯在那裡。 心裏想若果今次發生在自己的診所中，我可以點算呢？在法國，總算樹大好遮陰，上司都叫做睇住自己，有時候仲會有粉絲添，但還記得老細上次講過，一次錯足頂萬次功，所以有時候都幾矛盾，究竟自己可唔可以做一個稱職的治療師，即使我可以有很好的手藝，有經驗同頭腦去醫好病人，但卻有一個病人因為我的治療而令病情惡化，那我還算不算是一個好醫生呢？
很矛盾，可能已經出來的同學朋友門，你們未遇到過我這樣的遭遇，幸運的是我還打著工，老細會幫我擋住，大家要小心啊。每一次的打擊都令我成長，至少我會知道下次點樣去面對，跌低後最重要係企番起身，下次就唔會咁容易被打低。所以在法國工作，真的學到不少東西。剛剛又出了雙糧，我會唔會好似碧姖同瑪花咁，一入去就唔再返出O黎呢？我不知道 ...
老細話我仲有 10 日大假未清，要係 3、4 月放埋，我都覺得自己需要放一放假，抖一抖氣，希望下次放假，真的可以放開懷抱，輕鬆一下。

ER 感想

很懷念 ER 的日子，雖然近幾年己經無睇，因為心目中的主角 CARL 都己經無做。還記得第一次睇 ER，係我和我哥哥共同的嗜好之一，還記得當年仲未到中五，但我阿哥己是中大醫學生，他看還是想看多一點醫學知識，我看，除了因為我想學英文之外，亦因為這個故事真的很吸引。那時還未有無線的妙手仁心 (無線的真的差很多皮) ，我相信有很多人都會因為睇完呢套劇而有衝動去做醫生，不只是做醫生人工高，幫到人，那些愛情故事也很吸引，至少我是其中一人。

不經不覺，十五年了，很喜愛舊人：DR. GREEN , 黑鬼, SUSAN, CARL 都出來講佢地拍劇的感受，他們都說得很好，這套劇不是表演醫生有幾叻或者幾偉大，而係將社會上很多會發生的事情放在劇上，有點說教，醫生唔係聖人，佢地都有醫唔到的人，醫生都有人性，有私心、有爭權的人，雖然我宜家在醫院工作，更知道香港的急症室並不是這樣，至少我看見的並不是這麼緊張和生死關頭。

很喜愛的鏡頭是很開頭 DR GREEN 去追 SUSAN 這一幕，他好鍾意呢個女醫生，可惜佢追唔到班火車，另一個同樣喜愛的是 GEORGE CLOONEY 係去水渠及大雨中救出小朋友的一幕。很遺憾的是看不到一幕 CARL 同一個 MEDICAL STUDENT 俾個痴線佬插了兩刀，個女死了，剩下 CARL，曾經諗過去 BLOCK BUSTER 買番O黎睇，可惜一買要買成個 BOX SET﹐現在？唔想追了。當知道自己無可能成為醫生的一刻，有一段時間真的不想看這套劇，但最後都是看多一兩個SEASON ...

即管做唔到醫生，即管我現在知道醫生並不是戲中的這樣，我還是很欣賞這套劇。最喜愛劇後那段音樂，好彭拜，好激昂，總之聽到個人好有 ENERGY，永遠懷念。